Симбринза 5 мл капли глазные

Сипаттама

Дәрілік препаратты медициналық қолдану жөніндегі нұсқаулық

Саудалық атауы

Симбринза*

Халықаралық патенттелмеген атауы

Жоқ

Дәрілік түрі, дозасы

Көзге тамызатын дәрі, суспензия, 5 мл

Фармакотерапиялық тобы

Сезім ағзалары. Офтальмологиялық препараттар. Глаукомаға қарсы препараттар және миотиктер. Карбоангидраза тежегіштері. Басқа препараттармен біріктірілген бринзоламид.

АТХ коды S01EC54

Қолданылуы

- ашық бұрышты глаукомасы немесе көзішілік гипертензиясы бар пациенттерде жоғары көзішілік қысымды (КІҚ) төмендетуде, монотерапия көзішілік қысымның жеткілікті төмендеуін қамтамасыз етпегенде

Қолданудың басталуына дейін қажет болатын мәліметтер тізбесі

Қолдануға болмайтын жағдайлар

-белсенді немесе қосымша заттарға немесе сульфонамидтерге жоғары сезімталдық;

-препаратты моноаминоксидаза (MAO) тежегішімен қабылдайтын пациенттер;

-норадренергиялық берілісті нашарлататын антидепрессанттарда жүрген пациенттер (мысалы, трициклды антидепрессанттар және миансерин);

-бүйрек функциясының ауыр бұзылуы бар пациенттер;

-гиперхлоремиялық ацидозы бар пациенттер;

-жаңа туған нәрестелерге және 8 (сегіз) жасқа дейінгі балаларға

Қолдану кезіндегі қажетті сақтандыру шаралары

Дәрілік препаратты инъекция түрінде енгізуге болмайды. Пациенттерге Симбринза* дәрілік препаратын жұтып қоюдан сақтану қажет.

Зейін қою

Егде жастағы пациенттерде карбоангидраза тежегіштерін пероральді қабылдау жоғары зейін қоюды және/немесе қозғалыс үйлесімін талап ететін қызметті орындау қабілетіне әсер етуі мүмкін. Жергілікті қолданғанда Симбринза* препараты жүйелі қан ағымына өтеді.

Көзге тамызатын дәріні қолданудан кейін жүйелі резорбцияны болдырмау үшін келесі шараларды қабылдау ұсынылады:

-көзді 2 минутқа жұму,

- 2 минут бойы көз жасы өткелін саусақпен басып тұру.

Басқа дәрілік препараттармен өзара әрекеттесуі

Симбринза* препаратының басқа көзге тамызатын дәрілік заттармен өзара әрекеттесуіне зерттеулер жүргізілмеді.

Моноаминоксидаза тежегіштері және трициклды антидепрессанттар

Симбринза* препараты моноаминоксидаза тежегіштерімен ем алатын пациенттерге және әсер ету механизмі жүйке импульсінің норадренергиялық синапс берілісіне ықпал ететін антидепрессанттар (мысалы, трициклды антидепрессанттар және миансерин) қабылдайтын пациенттерде қарсы көрсетілімді.

Трициклды антидепрессанттар Симбринза* препаратының КІҚ төмендетуіне берілетін жауапты бәсеңдетуі мүмкін.

ОЖЖ депрессанттары

ОЖЖ депрессанттарын (мысалы, алкоголь, барбитураттар, апиындар, тыныштандыратын немесе ауыруды басатын дәрілер) қабылдау кезінде, қосымша немесе көтермелеуші әсер ету мүмкіндігіне орай, сақ болуға кеңес беріледі.

Симбринза* препаратын қолданудан кейін айналымдағы катехоламиндер деңгейі жөнінде деректер жоқ. Алайда, метаболизмге теріс әсер етуі және айналымдағы аминдерді (мысалы, хлорпромазин, метилфенидат, резерпин, серотонин-норэпинефринді кері қармау тежегіштерін) сіңіруі мүмкін дәрілік препараттарды қабылдайтын пациенттерде сақ болу керек.

Гипотензиялық/жүрек гликозидтері

Альфа-адренергиялық агонистер (мысалы, бримонидин тартраты), класс ретінде, тамыр соғу жиілігін және артериялық қысымды төмендетуі мүмкін. Бірнеше пациентте Симбринза* препаратын қолдану нәтижесінде артериялық қысымның аздап төмендеуі байқалды. Симбринза* препаратымен гипотензиялық дәрілік препараттарды және/немесе жүрек гликозидтерін бір мезгілде қолдану кезінде сақ болу керек.

Альфа-адренорецепторлар агонистерімен өзара әрекеттесуі немесе олардың әсерін бұзуы мүмкін қатарлас жүйелі дәрілік препараттарды (дәрілік түріне қарамастан), яғни адренергиялық рецепторлардың агонистерін немесе антагонистерін (мысалы, изопреналин, празозин) қабылдау басталғанда (немесе дозасын өзгерткенде) сақтық таныту керек.

Пероральді карбоангидраза тежегіштері

Бринзоламид – карбоангидраза тежегіші, әрі ол жергілікті қолданылуына қарамастан жүйелі қан ағымына өтеді. Карбоангидраза тежегіштерінің пероральді түрлерін қолданғанда қышқыл-сілтілік тепе-теңдік бұзылуының дамуы сипатталды. Симбринза* препаратын қабылдап жүрген пациенттерде дәрілік өзара әрекеттесу мүмкіндігін ескеру қажет.

Ішке карбоангидраза тежегішін және жергілікті қолданылатын бринзоламидті қабылдап жүрген пациенттерде карбоангидраза тежегіштерінің белгілі жүйелі әсерлеріне аддитивті синергизмнің даму мүмкіндігі болады. Симбринза* препаратын және пероральді карбоангидраза тежегіштерін бір мезгілде қолдану ұсынылмайды.

CYP3A4 тежегіштері

Бринзоламид метаболизміне P-450 цитохромының изоферменттері: CYP3A4 (негізгі), CYP2A6, CYP2B6, CYP2C8 және CYP2C9 жауап береді. Бринзоламид метаболизмінің тежелу мүмкіндігіне орай, кетоконазол, итраконазол, клотримазол, ритонавир және тролеандомицин сияқты CYP3A4 изоферментін тежейтін препараттарды абайлап тағайындау керек. CYP3A4 изоферментінің тежегіштерін бірге тағайындағанда сақ болу керек. Алайда, бринзоламидтің жиналып қалу ықтималдығы аз, өйткені ол бүйрекпен шығарылады. Бринзоламид P-450 цитохромы изоферменттерінің тежегіші емес.

Арнайы сақтандырулар

Офтальмологиялық әсерлері

Симбринза* препаратын жабық бұрышты глаукомасы бар пациенттерде қолдану зерттелмеген, сондықтан да ұсынылмайды.

Мөлдір қабығы зақымданған пациенттерде (әсіресе, эндотелий жасушаларының саны аз пациенттерде) мөлдір қабықтың эндотелий функциясына бринзоламидтің әсер ету мүмкіндігі зерттелмеді. Атап айтқанда, жанаспалы линзалар тағатын пациенттерде бринзоламидтің қолдану кезіндегі әсері зерттелмеді, сондықтан мөлдір қабықтың жай-күйін бақылау қажет, өйткені карбоангидраза тежегіштері оның гидратациясының бұзылуына әкелуі мүмкін, ал жанаспалы линзалар тағу мөлдір қабықтың зақымдану қаупін арттыруы мүмкін (төмендегі «Бензалконий хлориді» бөлімінен әріқарай жанаспалы линзаларды тағу жөніндегі нұсқаулықтарды қараңыз). Мөлдір қабық зақымданулары, қант диабеті немесе мөлдір қабық дистрофиясы бар пациенттерге мұқият мониторинг өткізу ұсынылады.

Бримонидин тартраты көздің аллергиялық реакцияларын тудыруы мүмкін. Аллергиялық реакциялар туындағанда емдеуді тоқтату керек. Кейбір жағдайларда КІҚ көтерілуімен байланысты болған бримонидин тартратын қолданудан кейінгі көздің аса жоғары сезімталдығының кейіннен білінетін реакциялары хабарланды.

Симбринза* препаратымен емдеуді тоқтатудан кейінгі ықтималды әсерлері зерттелмеді. Симбринза* препаратын қолданудан кейінгі КІҚ төмендеуі әсерінің ұзақтығы зерттелмесе де, бринзоламидке тән КІҚ төмендету әсерінің 5-7 күнге созылатыны күтіледі. Бримонидин қолданудан кейін КІҚ төмендеу әсері одан ұзаққа созылуы мүмкін.

Жүйелі әсері

Симбринза* құрамында карбоангидразаның сульфонамидті тежегіші –бринзоламид бар болғандықтан, жергілікті қолданылуына қарамастан, жүйелі қан ағымына өтеді. Жергілікті қолданғанда сульфаниламидтерге тән жағымсыз реакциялар туындауы мүмкін. Күрделі реакциялардың немесе жоғары сезімталдықтың симптомдары туындағанда осы препаратты қабылдау тоқтатылу керек.

Жүрек тарапынан бұзылулар

Симбринза* препаратын қолданудан кейін кейбір пациенттерде артериялық қысымның аздап төмендеуі байқалды. Симбринза* препаратымен гипотензиялық дәрілерді және/немесе жүрек гликозидтерін бір мезгілде қабылдағанда, сондай-ақ ауыр немесе тұрақсыз әрі бақыланбайтын жүрек-қантамыр аурулары бар пациенттерді емдегенде сақ болу керек.

Симбринза* препаратын депрессиясы, церебральді немесе коронарлық жеткіліксіздігі, Рейно феномені, ортостаздық гипотензиясы немесе облитерациялайтын тромбангииті бар пациенттерде сақтықпен пайдалану керек.

Қышқыл-сілтілік тепе-теңдік бұзылулары

Карбоангидраза тежегіштерінің пероральді түрлерін қолдану кезінде қышқыл-сілтілік тепе-теңдік бұзылуының дамуы сипатталды. Симбринза* құрамында карбоангидраза тежегіші - бринзоламид бар, ал ол жергілікті қолдануға қарамастан жүйелі қан ағамына өтеді. Препаратты жергілікті қолдану кезінде карбоангидраза тежегіштерін пероральді қабылдау себебінен болатын жағымсыз реакциялар (яғни, қышқыл-сілтілік тепе-теңдік бұзылулары) туындауы мүмкін.

Бүйрек функциясының бұзылуы

Симбринза* препаратын метаболизмдік ацидоз дамуы мүмкін қауіпке байланысты, ауыр дәрежедегі бүйрек функциясының бұзылуы бар пациенттерде сақтықпен қолдану керек. Симбринза* препараты бүйрек функциясының ауыр бұзылулары бар пациенттерде қолдануға қарсы көрсетілімді.

Бауыр функциясының бұзылуы

Симбринза* препараты бауыр функциясының бұзылуы бар пациенттерде зерттелмеген, сондықтан пациенттердің осындай топтарын емдегенде сақ болу керек.

Бензалконий хлориді

Симбринза* препаратының құрамында көздің тітіркенуін тудыруы және жұмсақ жанаспалы линзалардың түсін өзгертуі мүмкін бензалконий хлориді бар. Жұмсақ жанаспалы линзалармен жанасудан сақтаныңыз. Пациенттерге Симбринза* препаратын қолданар алдында жанаспалы линзаларды шешіп қою қажеттілігін, одан кейін жанаспалы линзаларды қайта кимес бұрын 15 минут күте тұру керектігін айту қажет.

Бензалконий хлоридінің көздің тітіркенуі мен құрғауын туғызатыны және көз жасы үлбірі мен мөлдір қабық беткейіне әсер етуі мүмкін екені хабарланды. Препаратты көздің құрғап кетуі болатын пациенттерде және мөлдір қабықтың зақымдануы болуы мүмкін пациенттерде абайлап қолдану керек. Ұзақ уақыт қолдану кезінде көрсетілген жағдайларға қатысты бақылау қажет.

Педиатрияда қолдану

Симбринза* препаратын 2-ден 17 жасқа дейінгі балалар мен жасөспірімдерде қолдану тиімділігі мен қауіпсіздігі туралы деректер анықталмаған. Бримонидиннің артық дозалану симптомдары (санадан айрылу, гипотония, брадикардия, гипотермия, цианоз және апноэны қоса) туа біткен глаукоманы емдеудің бір бөлігі ретінде бримонидин көзге тамызатын дәрісін қабылдаған жаңа туған нәрестелер мен балаларда тіркелді. Сондықтан Симбринза* препараты 8 жасқа дейінгі балаларда қарсы көрсетілімді.

Препараттың орталық жүйке жүйесіне ықпал етуімен байланысты жағымсыз әсерлердің пайда болу мүмкіндігіне орай, 2 жастан бастап және одан үлкен (әсіресе, 2-7 жас аралығындағы және/немесе салмағы <20 кг) балаларды емдеуге ұсынылмайды.

Жүктілік немесе лактация кезінде

Симбринза* препаратын жүктілік кезінде қолдануға қатысты сәйкес деректер жоқ немесе деректер шектеулі. Симбринза* препараты жүктілік кезінде және контрацепцияны пайдаланбайтын ұрпақ өрбіту жасындағы әйелдерде қолдануға ұсынылмайды.

Симбринза* препаратының адамда емшек сүтімен бөліну-бөлінбеуі белгісіз. Пероральді енгізілген бримонидин емшек сүтімен бөлінеді. Симбринза* препаратын бала емізу кезеңіндегі әйелдерге тағайындауға болмайды.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Симбринза* препараты көлік құралын басқару және механизмдерді пайдалану қабілетіне орташа әсер етуі мүмкін.

Симбринза* препараты көлік құралын басқару және механизмдерді пайдалану қабілетін нашарлатуы мүмкін бас айналуын, шаршауды және/немесе ұйқышылдықты тудыруы мүмкін.

Көздің уақытша анық көрмеуін немесе көрудің басқа бұзылыстары көлік құралын басқару және механизмдерді пайдалану қабілетіне ықпал етуі мүмкін. Егер препаратты қолдану кезінде анық көрмеу туындаса, пациент көлік басқаруға немесе механизмдерді пайдалануға кіріспес бұрын көру қабілетінің қалпына келуіне дейін күте тұру қажет.

Пероральді қолданылатын карбоангидраза тежегіштері егде жастағы адамдардың жоғары зейін қоюды және/немесе қозғалыс үйлесімін талап ететін қызметпен шұғылдану қабілетіне ықпал етуі мүмкін.

Қолдану жөніндегі нұсқаулар

Дозалау режимі

Ұсынылатын доза – Симбринза* препаратының бір тамшысы зақымданған көзге (көздерге) тәулігіне екі рет.

Енгізу әдісі және жолы

Тек жергілікті офтальмологиялық қолдану үшін.

Қолданар алдында құтыны шайқау қажет. Құтының ішіндегісін ластап алмас үшін пипетканың ұшын көзге немесе кез келген басқа беткейге тигізіп алмау керек. Пайдаланудан кейін құтыны тығыз жабылған күйде ұстау керек.

Симбринза* препаратын КІҚ төмендету үшін жергілікті қолданылатын басқа офтальмологиялық препараттармен бір мезгілде пайдалануға болады. Жергілікті қолданылатын офтальмологиялық препаратты біреуден көп қолданғанда тамызулар арасында кем дегенде 5 минут аралық қадағалану қажет.

Емдеу ұзақтығы

Емдеу ұзақтығын емдеуші дәрігер белгілейді.

Артық дозалану жағдайында қабылдау қажет болатын шаралар

Электролиттік теңгерімсіздік, ацидоздық жай-күй дамуы және жүйке жүйесіне болжамды әсерлері бринзоламидпен артық дозаланудан кейін туындауы мүмкін. Сарысудағы электролиттер деңгейлерін (әсіресе, калий) және қандағы pH деңгейін бақылап отыру керек.

Ересектерде бримонидинді кездейсоқ жұтып қою жөніндегі өте шектеулі ақпарат бар; гипотензия сияқты тек осындай жағымсыз құбылыс тіркелді. Көздеусіз жұтып қойған бримонидинмен артық дозалану симптомдары педиатриялық пациенттерде тіркелді. ОЖЖ депрессиясы симптомдары, әдеттегі уақытша кома немесе сананың әлсіреуі, летаргия, ұйқышылдық, гипотония, брадикардия, гипотермия, бозару, тыныс тарылуы және апноэ байқалды. Барлық мәлімделген субъектілер 6-24 сағат ішінде толық қалпына келді.

Пероральді артық дозалануды емдеу өзінде демеуші және симптоматикалық емді қамтиды; тыныс жолдарының еркін өткізгіштігіне демеу көрсетілуі тиіс. Кездейсоқ және көздеусіз артық дозалану кезінде дәрігерге қаралу керек.

Дәрілік препараттың бір немесе бірнеше дозасын өткізіп алу кезіндегі қажетті шаралар

Егер дозаны өткізіп алса, онда емдеу кесте бойынша келесі дозамен жалғастырылуы тиіс. Доза зақымданған көзге (көздерге) тәулігіне 2 рет 1 тамшыдан аспауы тиіс.

Тоқтату симптомдары қаупінің болуына көрсетілім

Қатысты емес.

Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі нұсқаулар

Қатысты емес.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар (қажет болса)

Төменде көрсетілген жағымсыз реакциялар келесі шартты белгіге сәйкес жіктеледі: өте жиі (≥ 1/10), жиі (≥ 1/100-ден <1/10 дейін), жиі емес (≥1/1,000-нан <1/100 дейін), сирек (≥1/10,000-нан <1/1,000 дейін), өте сирек (<1/10,000) немесе белгісіз (қолжетімді деректер негізінде бағалау мүмкін емес). Әрбір топ шегінде жағымсыз реакциялар күрделілігінің кему ретімен берілген.

Жиі (≥ 1/100-ден < 1/10 дейін)

- ұйқышылдық¹, бас айналу³, дисгевзия¹

- ауыздың кеберсуі¹

- көз аллергиясы¹, кератит¹, көздің ауыруы¹, көздегі жайсыздық¹, анық көрмеу¹, көру қабілетінің бұзылуы³, көз гиперемиясы¹, конъюнктиваның бозаруы³

Жиі емес (≥ 1/1,000-нан < 1/100 дейін)

- назофарингит², фарингит², синусит²

- эритроциттер санының азаюы², қанда хлорид мөлшерінің артуы²

- жоғары сезімталдық³

- апатия, депрессия³, депрессиялық жай-күй², ұйқысыздық¹, жыныстық құштарлықтың төмендеуі², түнгі қорқынышты түстер², күйгелектік²

- бас ауыру¹, қимыл үйлесімінің бұзылуы², амнезия², жады нашарлауы², парестезия²

- диспепсия¹, эзофагит², асқазан-ішек жайсыздануы¹, диарея², құсу², жүрек айну², дәреттің жиілеуі², метеоризм², оральді гипестезия², ауыз қуысының парестезиялары¹

- бауыр функциясының атиптік сынамасы²

- жанаспалы дерматит¹, есекжем², бөртпе², макула-папулёзді бөртпе², жайылған қышыну², алопеция², тері тығыздығының төмендеуі²

- мөлдір қабық эрозиясы¹, мөлдір қабық ісінуі², блефарит¹, мөлдір қабықтағы шөгінділер (преципитаттар)¹, конъюнктивалық бұзылыс (бұдырлары)¹, көз қарығу¹, фотопсия², көз ісінуі², қабақ ісінуі¹, конъюнктивалық ісіну, көздің құрғауы¹, көзден бөліністер¹, көру өткірлігінің төмендеуі², көз жасының көп ағуы, птеригиум², қабақ эритемасы¹, мейбомианит², диплопия², жарық сәулеге сезімталдық², көз гипестезиясы, ақ қабық пигментациясы ², конъюнктива астындағы киста², көздегі әдеттен тыс сезімталдық¹, астенопия¹

- бас айналу¹, құлақтың шыңылдауы²

- жүрек-тыныс алу жеткіліксіздігі², стенокардия², аритмия³, жүректің жиі соғуы^2,3, жүрек ырғағының бұзылуы², брадикардия^2,3, тахикардия³

- гипотензия¹

- диспноэ², бронхтың аса жоғары белсенділігі², фаринголарингеальді ауыру², тамақтың құрғап кетуі¹, жөтел², мұрыннан қан кету², жоғарғы тыныс жолдарының бітелуі², мұрынның бітелуі¹, ринорея², тамақтың жыбырлауы², мұрын шырышының құрғауы¹, постназальді ісіп кету¹, түшкіру²

- белдің ауыруы², бұлшықеттердің түйілуі², миалгия²

- бүйректің ауыруы²

- эректильді дисфункция²

- ауыру², кеуде қуысындағы жайсыздық², әдеттен тыс түйсіктер², үрей сезімі², тітіркенгіштік², препараттың қалдығы¹

Өте сирек (<1/10,000)

- естен тану³

- увеит³, миоз³

- гипертензия³

Белгісіз

- ринит²

- тремор², гипестезия², агевзия²

- беттің ісінуі³, дерматит^2,3, эритема^2,3

- көру бұзылыстары², мадароз²

- демікпе²

- артралгия², аяқ-қолдың ауыруы²

- поллакиурия²

- кеуденің ауыруы², шеткері ісіну^2,3

• - Симбринза* көзге тамызатын дәрісін қолдану кезінде байқалған жағымсыз реакция
• - бринзоламид монотерапиясын қолдану кезінде байқалған қосымша жағымсыз реакция
• - бримонидин монотерапиясын қолдану кезінде байқалған қосымша жағымсыз реакция

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) жөніндегі ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Тауарлар мен

көрсетілетін қызметтердің сапасы мен қауіпсіздігін бақылау комитетінің «Дәрілік заттар мен медициналық бұйымдарды сараптау ұлттық орталығы» техникасын сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препарат құрамы

1 мл препарат құрамында:

белсенді заттар: бринзоламид – 10.0¹ мг, бримонидин тартраты – 2.0 мг; қосымша заттар: карбомер (974Р), натрий хлориді, маннитол, пропиленгликоль, тилоксапол, бор қышқылы, бензалконий хлоридінің 50% ерітіндісі, натрий гидроксиді және/немесе хлорсутек қышқылы (рН түзету үшін), тазартылған су.

¹ - өндірістегі 2% артық мөлшері есебінсіз

Сыртқы түрі, иісі, дәмінің сипаттамасы

Ақ немесе ақ дерлік түсті біртекті суспензия.

Шығарылу түрі және қаптамасы

Дозаторы және полипропиленнен жасалған «дроп-тейнер» типті ақ түсті бұралатын қалпақшасы бар тығыздығы төмен полиэтиленнен жасалған мөлдір емес цилиндр құтыға 5 мл суспензиядан салады.

Медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға 1 құтыдан салынады.

Сақтау мерзімі

2 жыл.

Құтыны ашқаннан кейін препаратты пайдалану – 4 апта.

Жарамдылық мерзімі өткеннен кейін қолдануға болмайды!

Сақтау шарттары

30°C-ден аспайтын температурада сақтау керек.

Балалардың қолы жетпейтін жерде сақтау керек!

Дәріханалардан босатылу шарттары

Рецепт арқылы

Өндіруші туралы мәліметтер

с.а. Алкон-Куврер н.в.,

B-2870 Пуурс, Бельгия

Тіркеу куәлігінің ұстаушысы

Новартис Фарма АГ,

Лихтштрассе 35, 4056 Базель, Швейцария

Қазақстан Республикасы аумағында тұтынушылардандәрілік заттарсапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

Қазақстан Республикасындағы «Новартис Фарма Сервисэз АГ» компаниясының филиалы

050022 Алматы қ., Құрманғазы к-сі, 95

тел.: +7 (727) 258-24-47

факс: +7 (727) 244-26-51

электронды пошта: drugsafety.cis@novartis.com

Қалалар